您的当前位置:首页 > 神兽打法 > 正文

【民俗奇幻】芭蕉翼:烟花未开 (1)

作者:三国群英传日期:2020/1/31 22:01:02

  这是一篇纯台文小说,预计每週五 默认跟随国际桥牌社 更新,隔週三会有中文翻译版,所以不看台文的人可以等週三。小说分上下篇,约一个半月的短期连载。

  类型应该算是民俗奇幻,本来想标个少女恋爱,但被看稿的朋友说完全没有少女成分XD

  第一次尝试台文小说,用字尽量以教育部为准,请先进不吝指教!



  大正五年,烟花未开。

  三月日头到中昼嘛是赤燄燄,覆伫咧砖仔壁顶的乌猫嘛曝甲软膏膏,半瞑半醒之间,伊的鼻仔雄雄抽一下,目睭嘛擘金,然后跳落来土跤。

  惜惜对壁角踅出来,一个大篮仔踮伊焦瘦的胸坎前,篮仔内点薄臭臊味若有若无,伊看着乌猫,就跍落来,篮仔囥伫伊的大跤边,篮盖微微开一缝。

  「咪!」乌猫倚来篮仔边,但是予惜惜抢做前,共篮仔拖来尻脊骿后壁。

  「来。」惜惜共篮仔内上小尾的溪仔鱼,掷伫咧乌猫面头前,乌猫随咬落,共犹阁有土味的鱼仔食甲足好食款,一面食,一面予惜惜挲伊头壳顶的毛。

  惜惜的头鬃尾垂落青衫前,乌头盖面的铰剪眉下跤是乌肉瘦面,干焦目睭金烁烁咧看猫。

  一支竹篙忽然间扫过来,乌猫一声哀痛,目仔就走无去,賰半尾鱼仔伫土跤。

  「番仔婆阁咧毒猫矣!」

  四、五个平平十几岁的查埔囝,徛伫惜惜面头前,笑甲比日头卡燄。

  惜惜徛起来,共篮仔揽伫咧胸坎前,伊虽然已经有十五岁,身悬体格犹阁成囡仔人,踮遮查埔囝中央若像狗仔围猫。

  「毋是番仔婆,是番婆鬼。」后壁一个囡仔讲。

  「番婆鬼是伊的阿娘啦!」头前的囡仔讲,「番仔婆,你的心肝盍会无予恁阿娘食去?」

  「因为怹阿爹共怹阿娘刣做前矣。」另外一个囡仔讲。

  「阿爹刣阿娘,查某囝做歹人。」在先讲话的囡仔开始唸歌。

  惜惜头犁犁毋讲话,若是干焦按呢无算啥,逐工嘛咧听,但是上大汉彼个查埔囡仔伸手甲惜惜搝过来。

  「盍毋讲话?做哑口呢?」

  边仔的囡仔欲共惜惜揽牢牢的篮仔抢过,惜惜跤手猛,但是气力输人,篮仔内的鱼菜落落一土跤。

  「媠啦!按呢林家就袂予番婆鬼买的菜毒死矣。」

  惜惜气着,规个人对讲话的囡仔冲过,煞予人偃倒伫土跤,边仔随一跤过来,踢伫伊的尻川䫌。

  目睭瞌瞌,彼暝的血色就染红心肝,耳孔中除了笑声,犹阁有回忆中的哀鸣,彼当时惜惜啥物也无做,干焦听着阿娘的声音愈来愈细,连伊的面也看袂着……

  「曾惜惜是林家的人,这马列位敢是咧佮阮林家做对头?」

  清如流水的少年声倚来倚近,围伫惜惜边仔的囡仔随散去,惜惜现此时才褫金目睭,攑头看着一躯乌暝墨的诘襟(tsu̍-me-e-li)*,佮徛领顶头标緻的笑面。

  「林二少爷………」

  「阮是咧……佮伊迌啦。」

  高校的少年将车倒的篮仔捾起来。

  「毋过阮兜阿惜当咧买菜,无闲佮恁遮猴囡仔办公伙仔,犹毋紧闪!」

  笑面少爷轻轻仔歹一声,规大群囡仔走甲若飞,目仔随无去。

  「哼。」林知来笑面转乌,「臭竖仔。」

  「少爷……」惜惜对土跤爬起来,伸手共篮仔提转来,然后共土跤犹阁会当食的菜抾起来,但是鱼仔、豆腐……拢拍损去。

  「阿惜。」林知来对橐袋仔提出一寡零星仔,「遮予你去买菜,乘绁帮我买一本尪仔册,《台湾パック》(tâi uân phah ku)*你敢知?爱上新的喔!」

  惜惜顿头,林知来才展笑。

  「紧去吧。」

  转来到林家已经是午时,灶跤的阿敏嫂看着惜惜就结屎面,新来的阿华姊仔一面燃火,一面偷笑。

  「你是阁趖去佗位摸飞?去一咧菜市仔若拍去。」阿敏嫂共菜篮仔提过,看着内底的尪仔册,「这啥?」

  「少爷欲爱的。」惜惜细声回阿敏嫂。

  「人去买菜叫人买这五四三,时到就莫哗枵。」讲是按呢讲,阿敏嫂共尪仔册提予惜惜,「少爷的册,你先共提过予伊吧。」

  惜惜提了册,赶紧离开灶跤。

  这林家虽然无阿罩雾大房、太平四房遐呢出名,嘛是三落大厝,老夫人犹阁伫咧,林智恆佮林仁恆两兄弟分灶无分家,两家伙仔做伙徛踮祖厝,排第二的林仁恆蹛伫咧正厅西面,伊的大汉后生林知来的房间伫西护龙第一间。

  惜惜行入二门,共房门前白布掀予开,知来坐伫桌仔前写字,拄才的高校制服已经换做平常时的长衫。

  「少爷。」

  听着惜惜的声,知来越头,手股扞伫椅撑,伸手共册提过来。

  「多谢。」

  知来提着尪仔册,也无越转去册桌,跤曲咧椅仔顶,随共册掀开,掀两页就微微仔笑,自出世干焦提过笔的指头仔幼较若纸,毋过一个一个骨目嘛缀伊的年岁愈来愈粗,前两冬犹阁略仔肨奶,这站面瘦落,真正是十七通岁的春风少年兄。

  发现惜惜犹阁徛伫边仔看,知来攑头:「你嘛欲看呢?」

  惜惜幌头:「看无。」

  「来。」知来共册反一边予惜惜看,「这个秃头阿伯有看着无?伊就是台湾总督,边仔这个台湾人是江定,就是进前才予掠着彼个噍吧年事件的头人。」

  惜惜一面听一面顿头,但是毋知影彼是啥物人,伊看着知来的目睭,缀伊的话声金光烁烁。

  「讲起来嘛是真怪奇,这册本来伫台湾印,旧年总督府讲这违法,煞来徙去日本,印了阁坐三工船转来台湾,若是讲这册无好,是按哪日本就会使印咧?」

  知来的笑容干焦半边,惜惜感觉伊毋是咧笑,但是毋知影原因。

  这时,房门白布雄雄掀开。

  「二兄,你今仔盍会无来?」来者是较知来差不多平岁的少年,虽然讲矮小可仔,但是较有肉,一箍圆面诚古锥,伊踏入门才看着惜惜,「阿……阿惜嘛伫遮?」

  「鉴青少爷。」惜惜头犁犁,细声仔叫。

  这个林鉴青是知来大伯林智恆的第二后生,减知来一岁,人称三少爷,蹛伫咧东护龙第二间,定定来揣知来。

  「伊帮我提物件过来。」知来应话,「你咧?」

  「毋是讲好欲做伙去公学校陪知新练运动会的比赛?」鉴青大声,听起来诚委屈,「阮等足久呢。」

  知来笑咧讲:「遮大汉矣,阁爱人陪?」

  「伊才读公学校二年仔!」

  「原来才公学校二年仔,我犹阁想讲是十六岁矣。」

  鉴青过一下才听有知来咧共笑诙。

  「毋管啦!你明仔载一定爱来。」鉴青喝了就走。

  知来看三弟走去,越头问惜惜:「我拢犹袂应,你讲按呢敢有准算?」

  惜惜攑头看着知来的笑面,细声应:「阿惜是夫人买转来的人,知来少爷讲的拢准算。」

  知来的笑容无去。

  「这马的时代,人拢是自由的,哪有当买?」

  惜惜无讲话,知来叹一声。

  「你先去无闲吧。」

  「是。」惜惜应了,转去灶跤。

  犹未行到就听着阿华姊仔的声:「夫人是按哪会买彼个阿惜转来?人槌槌阁袂笑。」

  惜惜跤步停伫咧灶跤外口。

  「夫人嘛是好心,怹阿爹曾二豹较早是踮关刀山帮林家剉树仔的工人,啥知伊有一工会共怹牵手刣死,予警察大人掠去,賰阿惜一个,老爷毋焦帮怹爸母办后事,阁收伊做查某仔。」

  「盍会按呢?怹阿娘讨契兄呢?」

  「阁较害,听讲怹母仔是番婆鬼。」

  「番婆鬼?敢是会偷婴仔心肝彼个番婆鬼?」

  「嘿啊,伊是关刀山遐守城分的番仔婆,嫁予二豹隔冬就生阿惜,了后落胎几若遍拢无生,人讲因为番婆鬼注定会孤贫夭,才袂生后生,嘛有人讲是予伊家己食去。」

  「做人的查某囝袂当拣老母,但是做翁会当拣某,明明知影守城分遐拢番婆鬼,盍会去娶彼个番仔婆?遮呢惊人。」

  「着咩!老爷佮夫人欲收留阿惜彼当时,阮逐家惊较欲死,毋过六冬矣,无发生啥物代誌。」

  「好佳哉。」

  听到遮,惜惜刁工出力踏两步仔,然后行入去灶跤。

* 文中若是有写着日语,拢正文写日语,后壁用罗马字注音。

Copyright © 2017 - 2020 三国群英传私服 All rights reserved

在本站可以找到您想要的三国群英传私服游戏攻略和三国群英传olsf副本玩法,我们致力于让三国游戏玩家拥有最新的游戏体验!